সতিপট্ঠানসংযুত্ত

সতিসুত্ত

পুচ্ছা – সতিপট্ঠানসংযুত্তে আৱুসো পোৰাণকেহি ধম্মসংগাহক মহাথেৰেহি দুতিযং সংগীতং সতিসুত্তং ভগৱতা কত্থ কং কাৰব্ভ কথঞ্চ ভাসিতং.

ৱিস্সজ্জনা – ৱেসালিযং ভন্তে অম্বপালিৱনে সম্বহুলে ভিক্খূ আৰব্ভ ‘‘সতো ভিক্খৱে ভিক্খু ৱিহৰেয্য সম্পজানো অযং ৱো অম্হাকং অনুসাসনী’’তি এৱমাদিনা ভগৱতা ভাসিতং.

সালসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি চতুত্থং সংগীতং সালসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – কোসলেসু ভন্তে সালাযনাম কেসলানং ব্ৰাহ্মণগামে সম্বহুলে ভিক্খূ আৰব্ভ ‘‘যে তে ভিক্খৱে ভিক্খূ নৱা অচিৰপব্বজিতা অধুনাগতা ইমং ধম্মৱিনযং, তে ৱো ভিক্খৱে ভিক্খূ চতুন্নং সতিপট্ঠানানং ভাৱনায সমাদপেতব্বা নিৱেসেতব্বা পতিট্ঠাপেতব্বা’’তি এৱমাদিনা ভন্তে ভগৱতা ভাসিতং.

সকুণগ্ঘিসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি ছট্ঠং সংগীতং সকুণগ্ঘিসুত্তং ভগৱতা কত্থ কং আৰব্ভ কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ‘‘ভূতপুব্বং ভিক্খৱে সকুণগ্ঘি লাপং সকুণং সহসা অজ্ঝপ্পত্তা অগ্গহেসি. অথ খো ভিক্খৱে লাপো সকুণো সকুণগ্ঘিযা হৰিযমানো এৱং পৰিদেৱসি মযমেৱম্হ অলক্খিকা, মযং অপ্পপুঞ্ঞা, যে মযং অগোচৰে চৰিম্হ পৰৱিসযে, সচেজ্জ মযং গোচৰে চৰেয্যাম সকে পেত্তিকে ৱিসযে, ন ম্যাহং সকুণগ্ঘি অলং অভৱিস্স যদিদং যুদ্ধাযা’’তি এৱমাদিনা ভগৱতা ভাসিতং.

মযমেৱম্হ অলক্খিকা, মযং অপ্পপুঞ্ঞা.

কো পন তে লাপ গোচৰো সকো পেত্তিকো ৱিসযো.

যদিদং নঙ্গলকট্ঠকৰণং লেড্ডুট্ঠানং.

এহি খো দানি মে সকুণগ্ঘি, এহি খো দানি মে সকুণগ্ঘি,

(দাৰুগুড়োৱিয ৱিনিৱত্তিত্ৱা তস্সেৱ লেড্ডুস্স অন্তৰে পচ্চুপাদি. অট্ঠকথা)

এৱঞ্হি তং ভিক্খৱে হোতি যো অগোচৰে চৰতি পৰৱিসযে.

তস্মাতিহ ভিক্খৱে মা অগোচৰে চৰিত্থ পৰৱিসযে.

গোচৰে ভিক্খৱে চৰথ সকে পেত্তিকে ৱিসযে.

গোচৰে ভিক্খৱে চৰতং সকে পেত্তিকে ৱিসযে ন লচ্ছতি মাৰো ওতাৰং, ন লচ্ছতি মাৰো আৰম্মণং.

ভিক্খুনুপস্সযসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি দসমং সংগীতং ভিক্খুনুপস্সযসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে আযস্মন্তং আনন্দত্থেৰং আৰব্ভ ভাসিতং. আযস্মা ভন্তে আনন্দো যাৱত্তকো অহোসি ভিক্খুনীহি সদ্ধিং কথাসল্লাপো তং সব্বং ভগৱতো আৰোচেসি. তস্মিং ভন্তে ৱত্থুস্মিং ‘‘এৱমেতং আনন্দ, এৱমেতং আনন্দ, যোহি কোচি আনন্দ ভিক্খু ৱা ভিক্খুনী ৱা চতূসু সতিপট্ঠানেসু সুপ্পতিট্ঠিতচিত্তো ৱিহৰতি, তস্সেতং পাটিকঙ্খং উড়াৰং পুব্বেনাপৰং ৱিসেসং সঞ্জানিস্সতী’’তি এৱমাদিনা ভগৱতা ভাসিতং.

চুন্দসুত্ত

পুচ্ছা – তত্থেৱ আৱুসো দুতিযে নালন্দৱগ্গে পোৰাণকেহি ধম্মসংগাহকমহাথেৰেহি ততিযং সংগীতং চুন্দসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে আযস্মন্তংযেৱ আনন্দত্থেৰং আৰব্ভ ভাসিতং. আযস্মা ভন্তে আনন্দত্থেৰো চুন্দেন সমণুদ্দেসেন সদ্ধিং যেন ভগৱা তেনুপসঙ্কমি. উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো ভন্তে আযস্মা আনন্দো ভগৱন্তং এতদৱোচ ‘‘অযং ভন্তে চুন্দো সমণুদ্দেসো এৱমাহ ‘আযস্মা ভন্তে সাৰিপুত্তো পৰিনিব্বুতো, ইদমস্স পত্তচীৱৰ’ন্তি. অপি চ মে ভন্তে মধুৰকজাতো ৱিয কাযো, দিসাপি মে ন পক্খাযন্তি, ধম্মাপি মং নপ্পটিভন্তি ‘আযস্মা সাৰিপুত্তো পৰিনিব্বুতো’তি সুত্ৱা’’তি. তস্মিং ভন্তে ৱত্থুস্মিং ‘‘কিং নু খো তে আনন্দ সাৰিপুত্তো সীলক্খন্ধং ৱা আদায পৰিনিব্বুতো, সমাধিক্খন্ধং ৱা, পঞ্ঞাক্খন্ধংৱা, ৱিমুত্তিক্খন্ধংৱা, ৱিমুত্তিঞাণদস্সনক্খন্ধং ৱা আদায পৰিনিব্বুতো’’তি এৱমাদিনা ভগৱতা ভাসিতং.

অযং ভন্তে চুন্দোসমণুদ্দেসো এৱমাহ.

তস্মাতিহানন্দ অত্তদীপা ৱিহৰথ অত্তসৰণা অনঞ্ঞসৰণা ধম্মদীপা ধম্মসৰণা অনঞ্ঞসৰণা.

বাহিযসুত্ত

পুচ্ছা – তত্থেৱ আৱুসো পোৰাণকেহি ধম্মসংগাহকমহাথেৰেহি পঞ্চমং সংগীতং বাহিযসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে আযস্মন্তং বাহিযং আৰব্ভ ভাসিতং. আযস্মা ভন্তে বাহিযো ভগৱন্তং এতদৱোচ ‘‘সাধু মে ভন্তে ভগৱা সংখিত্তেন ধম্মং দেসেতু, যমহং ভগৱতো ধম্মং সুত্ৱা একো ৱূপকট্ঠো অপ্পমত্তো আতাপী পহিতত্তো ৱিহৰেয্য’’ন্তি. তস্মিং ভন্তে ৱত্থুস্মিং ‘‘তস্মাতিহ ত্ৱং বাহিয আদিমেৱ ৱিসোধেহি কুসলেসু ধম্মেসু. কো চাদিকুসলানং ধম্মানং, সীলঞ্চ সুৱিসুদ্ধং দিট্ঠিচ উজুকা’’তি এৱমাদিনা ভগৱতা ভাসিতং.