দেৱতাসংযুত্ত

ওঘতৰণসুত্ত

পুচ্ছা – তেনাৱুসো ভগৱতা জানতা পস্সতা অৰহতা সম্মাসম্বুদ্ধেন ওঘতৰণসুত্তং কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱতং আৰব্ভ ভাসিতং, অঞ্ঞতৰা ভন্তে দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেন ভগৱা তেনুপসঙ্কমি, উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি, একমন্তং ঠিতা খো সা দেৱতা ভগৱন্তং এতদৱোচ ‘‘কথং নু ত্ৱং মাৰিস ওঘমতৰী’’তি,

তস্মিং ভন্তে ৱত্থুস্মিং ‘‘অপতিট্ঠং খ্ৱাহং আৱুসো অনাযূহং ওঘমতৰিং’’তি, এৱং খো ভন্তে ভগৱতা ভাসিতং.

অচ্চেন্তিসুত্ত

পুচ্ছা – অচ্চেন্তিসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱতং আৰব্ভ ভাসিতং. অঞ্ঞতৰা ভন্তে দেৱতা ভগৱন্তং এতদৱোচ–

‘‘অচ্চেন্তি কালা তৰযন্তি ৰত্তিযো,

ৱযোগুণা অনুপুব্বং জহন্তি,

এতং ভযং মৰণে পেক্খমানো,

পুঞ্ঞানি কযিৰাথ সুখাৱহানী’’তি–

তস্মিং ভন্তে ৱত্থুস্মিং –

‘‘অচ্চেন্তি কালা তৰযন্তি ৰত্তিযো,

ৱযোগুণা অনুপুব্বং জহন্তি,

এতং ভযং মৰণে পেক্খমানো,

লোকামিসং পজহে সন্তিপেক্খো’’তি –

এৱং খো ভন্তে ভগৱতা ভাসিতং.

সত্তিসুত্ত

পুচ্ছা – সত্তিসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱতং আৰব্ভ ভাসিতং, অঞ্ঞতৰা ভন্তে দেৱতা ভগৱন্তং এতদৱোচ–

‘‘সত্তিযা ৱিয ওমট্ঠো, ডয্হমানোৱ মত্থকে;

কামৰাগপ্পহানায, সতো ভিক্খু পৰিব্বজে’’তি–

তস্মিং ভন্তে ৱত্থুস্মিং–

সত্তিযা ৱিয ওমট্ঠো ডয্হমানোৱ মত্থকে;

সক্কাযদিট্ঠিপ্পহানায, সতো ভিক্খু পৰিব্বজেতি;

এৱং খো ভন্তে ভগৱতা ভাসিতং.

সত্তিযা ৱিয ওমট্ঠো, ডয্হমানোৱ মত্থকে;

কামৰাগপ্পহানায, সতো ভিক্খু পৰিব্বজে –

সত্তিযা ৱিয ওমট্ঠো, ডয্হমানোৱ মত্থকে,

সক্কাযদিট্ঠিপ্পমানায, সতো ভিক্খু পৰিব্বজে –

জটাসুত্ত

পুচ্ছা – জটাসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱতং আৰব্ভ ভাসিতং, অঞ্ঞতৰা ভন্তে দেৱতা ভৱগন্তং এতদৱোচ–

‘‘অন্তো জটা বহিজটা, জটায জটিতা পজা;

তং তং গোতম পুচ্ছামি, কো ইমং ৱিজটযে জট’’ন্তি–

তস্মিং ভন্তে ৱত্থুস্মিং –

সীলে পতিট্ঠায নৰো সপঞ্ঞো, চিত্তং পঞ্ঞঞ্চ ভাৱযং;

আতাপী নিপকো ভিক্খু, সো ইমং ৱিজটযে জটং.

যেসং ৰাগো চ দোসো চ, অৱিজ্জা চ ৱিৰাজিতা;

খীণাসৱা অৰহন্তো, তেসং ৱিজটিতা জটাতি;

এৱমাদিনা ভন্তে ভগৱতা ভাসিতং.

সীলে পতিট্ঠায নৰো সপঞ্ঞো, চিত্তং পঞ্ঞঞ্চ ভাৱযং;

আতাপী নিপকো ভিক্খু, সো ইমং ৱিজটযে জটং–

যেসং ৰাগো চ দোসো চ, অৱিজ্জা চ ৱিৰাজিতা;

খীণাসৱা অৰহন্তো, তেসং ৱিজটিতা জটা–

যত্থ নামঞ্চ ৰূপঞ্চ, অসেসং উপৰুজ্ঝতি;

পটিঘং ৰূপসঞ্ঞা চ, এত্থেসা ছিজ্জতে জটা.

অচ্ছৰাসুত্ত

পুচ্ছা – অচ্ছৰাসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱপুত্তং আৰব্ভ ভাসিতং. অঞ্ঞতৰো ভন্তে দেৱপুত্তো ভগৱন্তং এতদৱোচ–

‘‘অচ্ছৰাগণসঙ্ঘট্ঠং, পিসাচ গণসেৱিতং;

ৱনন্তং মোহনং নাম, কথং যাত্ৰা ভৱিস্সতী’’তি.

তস্মিং ভন্তে ৱত্থুস্মিং–

‘‘উজুকো নাম সো মগ্গো, অভযা নাম সা দিসা,

ৰথো অকূজনো নাম, ধম্মচক্কেহি সংযুতো.

হিৰী তস্স অপালম্বো, সত্যস্স পৰিৱাৰণং;

ধম্মাহং সাৰথিং ব্ৰূমি, সম্মাদিট্ঠি পুৰেজৱং.

যস্স এতাদিসং যানং, ইত্থিযা পুৰিসস্স ৱা;

স ৱে এতেন যানেন, নিব্বানস্সেৱ সন্তিকে’’তি.

এৱং খো ভন্তে ভগৱতা ভাসিতং.

অচ্ছৰাগণসঙ্ঘুট্ঠং, পিসাচগণসেৱিতং;

ৱনন্তং মোহনং নাম, কথং যাত্ৰা ভৱিস্সতি–

জৰাসুত্ত

পুচ্ছা – জৰাসুত্তং পনাৱুসো ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে অঞ্ঞতৰং দেৱতং আৰব্ভ ভাসিতং. অঞ্ঞতৰা ভন্তে দেৱতা ভগৱন্তং এতদৱোচ–

‘‘কিং সু যাৱ জৰা সাধু, কিং সু সাধু পতিট্ঠিতং;

কিং সু নৰানং ৰতনং, কিং সু চোৰেহি দূহৰ’’ন্তি.

তস্মিং ভন্তে ৱত্থুস্মিং–

‘‘সীলং যাৱ জৰা সাধু, সদ্ধা সাধু পতিট্ঠিতা;

পঞ্ঞা নৰানং ৰতনং, পুঞ্ঞং চোৰেহি দূহৰ’’ন্তি.

এৱং খো ভন্তে ভগৱতা ভাসিতং.

কিং সু যাৱ জৰা সাধু.

কিং সু সাধু পতিট্ঠিতং.

কিং সু নৰানং ৰতনং.

কিং সু চোৰেহি দূহৰং.