নমো তস্স ভগৱতো অৰহতো সম্মাসম্বুদ্ধস্স

মহাৰহনীতি

পণ্ডিতকথা

১. মহাৰহৰহং সক্য,

মুনিং নীৱৰণা তণ্হা;

মুত্তং মুত্তং সুদস্সনং,

ৱন্দে বোধিৱৰং ৱৰং.

২. মুনিনা মুনিনাগেন,

দুট্ঠপব্বজ্জিতা জিতা;

যথা যথাঅসদ্ধম্ম-

পুৰণা পুৰণাদযো.

৩. তথা তথাগতোৱাদা,

নুগতে লোকনীতিযং;

কতযোগেন ৱিদূনা,

জেয্যোৱানত্থ কাৰিনো.

৪. নিতীধ জন্তুনং সাৰো,

মিত্তাচৰিযাচ পীতৰা;

নীতিমা সুবুদ্ধি ব্যত্তো,

সুতৱা অত্থদস্সিমা.

৫. কৱিহেৰঞ্ঞকা কত্ৱা,

সুত্তত্তং সত্থকঞ্চনং;

গজ্জপজ্জাদ্যালঙ্কাৰং,

কৰোন্তীধ মনোৰম্মং.

৬. ৱুত্যং ৱিসদঞাণস্স,

ঞাতো অত্থোতৰস্স ন;

সুৰপ্পভায আদাসো,

ছাযং দিস্সে ন মাকৰে.

৭. মহাতেজোপি তেজোযং,

মত্তিকং নমুদুকংকৰো;

আপো আপেতি মুদুকং,

সাধুৱাচাচ কক্খড়ং.

৮. মুদুনাৱ ৰিপুং জেতি,

মুদুনা জেতি দাৰুণং;

নোসিদ্ধং মুদুনা কিঞ্চি,

যত্ৱতো মুদুনা জযে.

৯. চন্দনং সীতলং লোকে,

ততো চন্দংৱ সীতলং;

চন্দনচন্দসীতম্হা,

ৱাক্যং সাধুসুভাসিতং.

১০. পত্তকল্লোদিতং অপ্পং,

ৱাক্যং সুভাসিতং ভৱে;

খুদ্দিতস্স কদন্নংপি,

সুত্তং সাদুৰসো সিযা.

১১. সত্থকাপি বহূৱাচা,

নাদৰা বহুভাণিনো;

সোপকাৰমুদাসীনং,

ননুদিট্ঠং নদীজলং.

১২. সংসাৰৱিসৰুক্খস্স,

দ্ৱযমেৱামতংফলং;

সুভাসিতস্সসাৰাদো,

সাধূহিৰসমাগমো.

১৩. পাসাণছত্তং গৰুকং,

ততো দেৱানচিক্খনা;

ততো ৱুড্ঢানমোৱাদো,

ততো বুদ্ধস্স সাসনং;

১৪. তুলং সল্লহুকং লোকে,

ততো চপলজাতিকো;

ততোনোৱাদিকো ততো,

যতি ধম্মেপমাদকো.

১৫. অহ গচ্ছতি হাযন্তী,

সত্তানমিধ জীৱিতং;

তস্মাহি মাপমত্তত্ৱং,

গচ্ছন্তু জিনসাসনে.

১৬. পণ্ডিতস্স পসংসায,

দণ্ডোবালেন দীযতে;

পণ্ডিতো পণ্ডিতেনেৱ,

ৱণ্ণিতোৱ সুৱণ্ণিতো.

১৭. সতেসু জাযতে সূৰো,

সহস্সেসুচ পণ্ডিতো;

ৱুত্তা সতসহস্সেসু,

দাতা ভৱতিৱা নৱা.

১৮. ভূপত্তংচ পণ্ডিতত্তঞ্চ,

নেৱতুল্যং কদাচিপি;

সদেসেপূজিতো ৰাজা,

বুদ্ধো সব্বত্থপূজিতো.

১৯. ক্ৱাতিভাৰো সমত্থানং,

কিংদূৰো ব্যৱহাৰিনং;

কোৱিদেসো সৱিজ্জানং,

কোপৰো পিযৱাদিনং.

২০. ননু তে যেৱসন্তা নো,

সাগৰা নকুলাচলা;

অপ্পম্পি মৰিযাদং যে,

সংৱট্টেৱি জহন্তিনো.

২১. পলযেতীতমৰিযাদা,

ভৱন্তিকিৰ সাগৰা;

মৰিযাদাতিকং সাধু,

নইচ্ছন্তি পলযেপি.

২২. সতং দীঘাযুকং সব্ব,

সত্তানং সুখকাৰণং;

অসতংপন সব্বেসং,

দুক্খহেতু নসংসযো.

২৩. পামোক্খে সুজনে সন্তে,

সব্বেপি সুজনা জনা;

জাতেকস্মিংসাৰগন্ধে,

সব্বে গন্ধমযা দুমা.

২৪. অত্তনা যদি একেন,

ৱিনতেন মহাজনা;

ৱিনযং যন্তি সব্বেপি,

কো তং নাসেয্য পণ্ডিতো.

২৫. সৰীৰস্স গুণানঞ্চ,

দূৰমচ্চন্ত মন্তৰং;

সৰীৰং খণৱিদ্ধংসি,

কপ্পন্তিট্ঠাযিনো গুণা.

২৬. যদি নিচ্চমনিচ্চেন,

নিমলং মলৱাহিনা;

যো সো কাযেন লভেথ,

কিংনলদ্ধং ভৱে নুকিং.

২৭. ধম্মত্থকামমোক্খানং,

পাণং সংসিদ্ধিকাৰণং;

তন্নিঘাতা কিন্নহতং,

ৰক্খনা কিন্নৰক্খিতং.

২৮. অত্তা বন্ধু মনুস্সস্স,

ৰিপু অত্তাৱ জন্তুনং;

অত্তাৱ নিযতো ঞাতি,

অত্তাৱ নিযতো ৰিপু.

২৯. অত্তনোপৰিচাগেন,

যংসিতমনুৰক্খনং;

কৰোন্তি সজ্জনাযেৱ,

ন তং নীতিমতা মতং.

৩০. তিণানি ভূমিৰুদকং,

চতুত্থী ৱাক্যসুট্ঠুতা;

এতানি হি সতংগেহে,

নোছিন্দন্তে কদাচিপি.

৩১. অম্বুং পিৱন্তিনো নজ্জো,

ৰুক্খো খাদতিনো ফলং;

মেঘো ক্ৱচিপি নো সস্সং,

পৰত্থায সতংধনং.

৩২. সতং ফৰুসৱাচাহি,

নযাতি ৱিকতিং মনো;

তিণুক্কাহি নসক্কাৱ,

তাপেতুং সাগৰে জলং.

৩৩. সম্পত্যং মহত্তংচেতো,

ভৱত্যুপ্পলকোমলং;

ৱিপ্পত্যঞ্চ মহাসেলে,

সিলাসঙ্ঘাদকক্কসো.

৩৪. অত্থং মহন্তমাপজ্জ,

ৱিজ্জং সম্পত্তিমেৱচ;

চৰেয্যামানথদ্ধোযো,

পণ্ডিতো সো পৱুচ্চতি.

৩৫. নালব্ভমভিপত্থেন্তি,

নট্ঠম্পি নচসোচৰে;

ৱিপ্পত্যঞ্চ নমুয্হন্তি,

যেনৰা তেৱ পণ্ডিতো.

৩৬. গণ্ঠিট্ঠানে একপদে,

নাতিমঞ্ঞেয্য পণ্ডিতো;

কিং অক্কো ৱেড়ুপব্ভাৰো,

তিমহাদীপভানুদো.

৩৭. গুণদোসেসুমেকেন,

নত্থি কোচি ৱিৱজ্জিতো;

সুখুমালস্স পদুমস্স,