৪. বালদুজ্জনকণ্ডো

৬৮. অতিপ্পিযো ন কাতব্বো,

খলো কোতূহলং কৰো;

সিৰসা ৱহ্যমানোপি,

অড্ঢপূৰো ঘটো যথা.

৬৯. সপ্পো দুট্ঠো খলো দুট্ঠো,

সপ্পো দুট্ঠতৰো খলো;

মন্তোসধেহি সো সপ্পো,

খলো কেনুপসম্মতি.

৭০. যো বালো মঞ্ঞতি বাল্যং,

পণ্ডিতো ৱাপি তেন সো;

বালোৱ পণ্ডিতমানী,

সো ৱে বালোতি ৱুচ্চতি.

৭১. মধুংৱ মঞ্ঞতী বালো,

যাৱ পাপং ন পচ্চতি;

যদাচ পচ্চতী পাপং,

অথ দুক্খং নিগচ্ছতি.

৭২. ন সাধু বলৱা বালো,

সহসা ৱিন্দতে ধনং;

কাযস্স ভেদা দুপ্পঞ্ঞো,

নিৰযং সোপপজ্জতি.

৭৩. ঘৰে দুট্ঠো চ মূসীকো চ,

ৱনে দুট্ঠো চ ৱানৰো;

সকুণে চ দুট্ঠো কাকো,

নৰে দুট্ঠোচ ব্ৰাহ্মণো.

৭৪. দীঘা জাগৰতো ৰত্তি,

দীঘং সন্তস্স যোজনং;

দীঘো বালান সংসাৰো,

সদ্ধম্মং অ-ৱিজানতং.

৭৫. তিল মত্তং পৰেসংৱ,

অপ্প দোসঞ্চ পস্সতি;

নাড়িকেৰম্পি সদোসং,

খল-জাতো ন পস্সতি.

৭৬. নত্তদোসং পৰে জঞ্ঞা,

জঞ্ঞা দোসং পৰস্সতু;

গুয্হে কুম্মো অঙ্গানি,

পৰ দোসঞ্চ লক্খযে.

৭৭. পণ্ডিতস্স পসংসায,

দণ্ডো বালেন দীযতে;

পণ্ডিতো পণ্ডিতেনেৱ,

ৱণ্ণিতোৱ সুৱণ্ণিতো.

৭৮. লুদ্ধং অত্থেন গণ্হেয্য,

থদ্ধং অঞ্জলি কম্মুনা;

ছন্দানুৱত্তিযা মূড়্হং,

যথাভূতেন পণ্ডিতং.

বালদুজ্জনকণ্ডো নিট্ঠিতো.