দাঠাৱংসো |ও০.০০০১|

নমো তস্স ভগৱতো অৰহতো সম্মাসম্বুদ্ধস্স

১. ৱিসাৰদং ৱাদপথাতি ৱত্তিনং,

তিলোকপজ্জোতমসয্হসাহিনং;

অসেস ঞেয্যাৱৰণপ্পহাযিনং,

নমামি সত্থাৰমনন্তগোচৰং.

২. |ও০.০০০২|

তিলোক নাথপ্পভৱং ভযাপহং,

ৱিসুদ্ধৱিজ্জাচৰণেহি সেৱিতং;

পপঞ্চ সংযোজনবন্ধনচ্ছিদং,

নমামি ধম্মং নিপুণং সুদুদ্দসং.

৩. পসাদমত্তেন’পি যত্থ পাণিনো,

ফূসন্তি দুক্খক্খযমচ্চুতং পদং;

তমাহুণেয্যং সুসমাহিতিন্দ্ৰিযং,

নমামি সঙ্ঘং মুনিৰাজসাৱকং.

৪. ৱিভুসযং কাড়কনাগৰন্ৱ যং,

পৰক্কমো কাৰুণিকো চমূপতি;

গৱেসমানো জিনসাসনস্স যো,

ৱিৰূড়্হিমত্থঞ্চ জনস্স পত্থযং.

৫. |ও০.০০০৩|

সুধামযূখামল পণ্ডুৱংসজং,

ৱিৰূড়্হসদ্ধং মুনিৰাজসাসনে;

পিযং ৱদং নীতিপথানুৱত্তিনিং,

সদা পজানং জনিকং’ৱ মাতৰং.

৬. পিযং পৰক্কন্তিভুজস্স ৰাজিনো,

মহেসি মচ্চুন্নতখুদ্ধিসম্পদং;

ৱিধায লীলাৱতিমিচ্ছিতত্থদং,

অসেস লঙ্কাতলৰজ্জলক্খিযং.

৭. কুমাৰমাৰাধিতসাধুমন্তিনং,

মহাদযং পণ্ডুনৰিন্দ ৱংসজং;

ৱিধায সদ্ধং মধুৰিন্দনামকং,

সুসিক্খীতং পাৱচনে কলাসু চ.

৮. |ও০.০০০৪|

নৰিন্দসুঞ্ঞং সুচিৰং তিসীহড়ং,

ইতিপ্পতীতং অযসং অপানুদি;

চিৰং পণীতেন চ চিৱৰাদিনা,

সুসঞ্ঞতে সংযমিনো অতপ্পযি.

৯. চিৰট্ঠিতিং পাৱচনস্স ইচ্ছতা,

কতঞ্ঞুনা ৱিক্কম বুদ্দিসালিনা;

সতীমতা চন্দিম বন্ধুকিত্তিনা,

সগাৰৱং তেন’ভীযাচিতো অহং.

১০. সদেস ভাসায কৱীহি সীহড়ে,

কতম্পি ৱংসং জিনদন্তধাতুযা;

নিৰুত্তিযা মাগধিকায ৱুদ্ধিযা,

কৰোমি দীপন্তৰৱাসিনং অপি.

১১. |ও০.০০০৫|

জীনো’যমিদ্ধে অমৰৱ্হযে পুৰে,

কদাচি হুত্ৱান সুমেধনামকো;

সৱেদৱেদঙ্গৱিভাগকোৱিদো,

মহদ্ধনে ৱিপ্পকুলম্হি মাণৱো.

১২. অহঞ্হি জাতিব্যসনেন পীড়িতো,

জৰাভিভুতো মৰণেন ওত্থটো;

সিৱং পদং জাতিজৰাদিনিস্সটং,

গৱেসযিস্সং’তি ৰহো ৱিচিন্তিয.

১৩. অনেকসঙ্খং ধনধঞ্ঞসম্পদং,

পতিট্ঠপেত্ৱা কপণেসি দুচ্চজং;

অনপ্পকে পেমভৰানুবন্ধিনো,

ৱিহায মিত্তে চ সুতেচ বন্ধৱে.

১৪. |ও০.০০০৬|

পহায কামে নিখিলে মনোৰমে,

ঘৰাভিনিক্খম্ম হিমাচলন্তিকে;

মহীধৰং ধম্মিকনাম ৱিস্সুতং,

উপেচ্চ নানাতৰুৰাজিভুসিতং.

১৫. মনোনুকূলে সুৰৰাজনিম্মীতে,

অসম্মিগানং অগতিম্হি অস্সমে;

নিৱত্তচীৰো অজিনক্খিপং ৱহং,

জটাধৰো তাপস ৱেসমগ্গহী.

১৬. সুসঞ্ঞতত্তোপৰিৱাৰি তিন্দ্ৰিযো,

ফলাফলাদীহি পৱত্তযং তনুং;

গতো অভিঞ্গ্ঞাসু চ পাৰমিং ৱসী,

তহিং সমাপত্তি সুখং অৱিন্দি সো.

১৭. |ও০.০০০৭|

সুসজ্জিতে ৰম্মপুৰাধিৱাসিনা,

মহাজনেন’ত্তমনেন অঞ্জসে;

পথপ্পদেসে অভিযন্তমত্তনো,

অনিট্ঠিতেযেৱ সুমেধ তাপসো.

১৮. অগাধঞেয্যোদধীপাৰদস্সিনং,

ভৱন্তগুং নিব্বনথং ৱিনাযকং;

অনেকখীণাসৱলক্খসেৱিতং,

কদা চি দীপঙ্কৰবুদ্ধমদ্দস.

১৯. ততো সসঙ্ঘস্স তিলোকভত্তুনো,

পৰিচ্চজিত্ৱান তনুম্পি জীৱিতং;

পসাৰযিত্ৱান জটাজিনাদিকং,

ৱিধায সেতুং তনুমেৱ পল্ললে.

২০. |ও০.০০০৮|

অনক্কমিত্ৱা কললং মহাদযে,

সভিক্খুকো গচ্চতু পিট্ঠিযা ইতি;

অধিট্ঠহিত্ৱান নিপন্নকো তহিং,

অনাথ মেতং তিভৱং সমেক্খিয.

২১. দযায সঞ্চোদিতমানসো জনে,

ভৱণ্ণৱা উদ্ধৰিতুং দুখদ্দিতে;

অকাসি সম্বোধিপদস্স পত্তিযা,

মহাভিনীহাৰমুদগ্গৱিক্কমো.

২২. |ও০.০০০৯|

অথো ৱিদিত্ৱা ৱসিনো তমাসযং,

অদাসি সো ৱ্যাকৰণং মহামুনি;

ততো পুৰং তম্হি তথাগতে গতে,

সযংৱসী সম্মসি পাৰমিগুণে.

২৩. ততো চ কপ্পানমলীনৱিক্কমো,

অসংখিযে সো চতুৰো সলক্খকে;

তহিং তহিং জাতিসু বোধিপাচনে,

ৱিসুদ্ধসম্ভাৰগুণে অপূৰযি;

অথাভিজাতো তুসিতে মহাযসো,

ৱিসুদ্ধসম্বোধিপদোপলদ্ধিযা;

উদিক্খমানো সমযং দযাধনো,

চিৰং ৱিভুতিং অনুভোসি সব্বসো.

২৫. |ও০.০০১০|

সহস্সসঙ্খা দসচক্কৱালতো,

সমাগতানেকসুৰাধিপাদিহি;

উদগ্গুদগ্গেহি জিনত্তপত্তিযা,

সগাৰৱং সো অভিগম্ম যাচিতো.

২৬. ততো চৱিত্ৱা কপিড়ৱ্হযে পুৰে,

সদা সতো সক্যকুলেককেতুনো;

অহোসি সুদ্ধোদনভুমিভত্তুনো,

মহাদিমাযায মহেসিযা সুতো.

২৭. |ও০.০০১১|

ৱিজাতমত্তো’ৱ ৱসুন্ধৰায সো,

পতিট্ঠহিত্ৱান দিসা ৱিলোকযী;

তদা অহেসুং ৱিৱটঙ্গনা দিসা,

অপূজযুং তত্থ চ দেৱমানুসা.

২৮. আধাৰযুং আতপৱাৰণাদিকং,

অদিস্সমানাৱ নভম্ভি দেৱতা;

পদানি সো সত্ত চ উত্তৰামুখো,

উপেচ্চ নিচ্ছাৰযি ৱাচমাসভিং.

২৯. যথত্থসিদ্ধত্তকুমাৰনামকো,

মহব্বলো যোব্বনহাৰিৱিগ্গহো;

উতুত্তযানুচ্ছৱিকেসু তীসু সো,

নুভোসি পাসাদৱৰেসু সম্পদং.

৩০. |ও০.০০১২|

কদাচি উয্যানপথে জৰাহতং,

তথাতুৰং কালকতঞ্চ সংযমিং;

কমেন দিস্ৱান ৱিৰত্তমানসো,

ভৱেসু সো পব্বজিতুং অকামযি.

৩১. সপুপ্ফদীপাদীকৰেহি ৰত্তিযং,

পুৰক্খতো সো তিদিৱাধিৱাসিহি;

সছন্নকো কন্তকৱাজিযানতো,

ততো মহাকাৰুণিকো’ভিনিক্খমি.

৩২. কমেন পত্ৱান অনোমমাপগং,

সুধোতমুত্তাফলহাৰিসেকতে;

পতিট্ঠহিত্ৱা ৱৰমোড়িবন্ধনং,

সিতাসিলূনং গগনে সমুক্খিপী.

৩৩. |ও০.০০১৩|

পটিগ্গহেত্ৱা তিদসানমিস্সৰো,

সুৱণ্নচঙ্গোটৱৰেন তং তদা;

তিযোজনং নীলমণীহি চেতিযং,

অকাসি চূড়ামণিমত্তনো পুৰে.

৩৪. ততো ঘটীকাৰসৰোজযোনিনা,

সমাহটং ধাৰযী চীৱৰাদিকং;

অথো সকং ৱত্থযুগং নভত্থলে,

পসত্থৱেসগ্গহণো সমুক্খিপী.