(১১). ৰাগপেয্যালং

১১৭. ‘‘ৰাগস্স, ভিক্খৱে, অভিঞ্ঞায অট্ঠ ধম্মা ভাৱেতব্বা. কতমে অট্ঠ? সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি, সম্মাসমাধি – ৰাগস্স, ভিক্খৱে, অভিঞ্ঞায ইমে অট্ঠ ধম্মা ভাৱেতব্বা’’তি.

১১৮. ‘‘ৰাগস্স, ভিক্খৱে, অভিঞ্ঞায অট্ঠ ধম্মা ভাৱেতব্বা. কতমে অট্ঠ? অজ্ঝত্তং ৰূপসঞ্ঞী বহিদ্ধা ৰূপানি পস্সতি পৰিত্তানি সুৱণ্ণদুব্বণ্ণানি, তানি অভিভুয্য ‘জানামি পস্সামী’তি এৱংসঞ্ঞী হোতি. অজ্ঝত্তং ৰূপসঞ্ঞী বহিদ্ধা ৰূপানি পস্সতি অপ্পমাণানি সুৱণ্ণদুব্বণ্ণানি, তানি অভিভুয্য ‘জানামি পস্সামী’তি এৱংসঞ্ঞী হোতি. অজ্ঝত্তং অৰূপসঞ্ঞী বহিদ্ধা ৰূপানি পস্সতি পৰিত্তানি সুৱণ্ণদুব্বণ্ণানি, তানি অভিভুয্য ‘জানামি পস্সামী’তি এৱংসঞ্ঞী হোতি. অজ্ঝত্তং অৰূপসঞ্ঞী বহিদ্ধা ৰূপানি পস্সতি অপ্পমাণানি সুৱণ্ণদুব্বণ্ণানি, তানি অভিভুয্য ‘জানামি পস্সামী’তি এৱংসঞ্ঞী হোতি. অজ্ঝত্তং অৰূপসঞ্ঞী বহিদ্ধা ৰূপানি পস্সতি নীলানি নীলৱণ্ণানি নীলনিদস্সনানি নীলনিভাসানি পীতানি পীতৱণ্ণানি…পে… লোহিতকানি লোহিতকৱণ্ণানি…পে… ওদাতানি ওদাতৱণ্ণানি…পে… ওদাতনিভাসানি, তানি অভিভুয্য ‘জানামি পস্সামী’তি এৱংসঞ্ঞী হোতি – ৰাগস্স, ভিক্খৱে, অভিঞ্ঞায ইমে অট্ঠ ধম্মা ভাৱেতব্বা’’.

১১৯. ‘‘ৰাগস্স, ভিক্খৱে, অভিঞ্ঞায অট্ঠ ধম্মা ভাৱেতব্বা. কতমে অট্ঠ? ৰূপী ৰূপানি পস্সতি, অজ্ঝত্তং অৰূপসঞ্ঞী বহিদ্ধা ৰূপানি পস্সতি, সুভন্তেৱ অধিমুত্তো হোতি, সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি, সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি, সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি, সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি, সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি – ৰাগস্স, ভিক্খৱে, অভিঞ্ঞায ইমে অট্ঠ ধম্মা ভাৱেতব্বা’’.

১২০-১৪৬. ‘‘ৰাগস্স, ভিক্খৱে, পৰিঞ্ঞায…পে… পৰিক্খযায… পহানায… খযায… ৱযায… ৱিৰাগায… নিৰোধায… চাগায… পটিনিস্সগ্গায…পে… ইমে অট্ঠ ধম্মা ভাৱেতব্বা’’.

১৪৭-৬২৬. ‘‘দোসস্স…পে… মোহস্স… কোধস্স… উপনাহস্স… মক্খস্স… পড়াসস্স… ইস্সায… মচ্ছৰিযস্স … মাযায… সাঠেয্যস্স… থম্ভস্স… সাৰম্ভস্স… মানস্স… অতিমানস্স… মদস্স… পমাদস্স অভিঞ্ঞায…পে… পৰিঞ্ঞায… পৰিক্খযায… পহানায… খযায… ৱযায… ৱিৰাগায… নিৰোধায… চাগায… পটিনিস্সগ্গায…পে… ইমে অট্ঠ ধম্মা ভাৱেতব্বা’’তি.

ৰাগপেয্যালং নিট্ঠিতং.