৮. পঠমঅভব্বট্ঠানসুত্তং

৯২. ‘‘ছযিমানি, ভিক্খৱে, অভব্বট্ঠানানি. কতমানি ছ? অভব্বো দিট্ঠিসম্পন্নো পুগ্গলো সত্থৰি অগাৰৱো ৱিহৰিতুং অপ্পতিস্সো, অভব্বো দিট্ঠিসম্পন্নো পুগ্গলো ধম্মে অগাৰৱো ৱিহৰিতুং অপ্পতিস্সো, অভব্বো দিট্ঠিসম্পন্নো পুগ্গলো সঙ্ঘে অগাৰৱো ৱিহৰিতুং অপ্পতিস্সো, অভব্বো দিট্ঠিসম্পন্নো পুগ্গলো সিক্খায অগাৰৱো ৱিহৰিতুং অপ্পতিস্সো, অভব্বো দিট্ঠিসম্পন্নো পুগ্গলো অনাগমনীযং ৱত্থুং পচ্চাগন্তুং, অভব্বো দিট্ঠিসম্পন্নো পুগ্গলো অট্ঠমং ভৱং নিব্বত্তেতুং. ইমানি খো, ভিক্খৱে, ছ অভব্বট্ঠানানী’’তি. অট্ঠমং.