৩. ৱোৰোপিতসুত্তং

৮৭. ‘‘ছহি, ভিক্খৱে, ধম্মেহি সমন্নাগতো সুণন্তোপি সদ্ধম্মং অভব্বো নিযামং ওক্কমিতুং কুসলেসু ধম্মেসু সম্মত্তং. কতমেহি ছহি? মাতা জীৱিতা ৱোৰোপিতা হোতি, পিতা জীৱিতা ৱোৰোপিতো হোতি, অৰহং [অৰহা (স্যা. কং.), অৰহন্তো (ক.)] জীৱিতা ৱোৰোপিতো হোতি, তথাগতস্স দুট্ঠেন চিত্তেন লোহিতং উপ্পাদিতং হোতি, সঙ্ঘো ভিন্নো হোতি, দুপ্পঞ্ঞো হোতি জড়ো এড়মূগো. ইমেহি খো, ভিক্খৱে, ছহি ধম্মেহি সমন্নাগতো সুণন্তোপি সদ্ধম্মং অভব্বো নিযামং ওক্কমিতুং কুসলেসু ধম্মেসু সম্মত্তং.

‘‘ছহি, ভিক্খৱে, ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্তং. কতমেহি ছহি? ন মাতা জীৱিতা ৱোৰোপিতা হোতি, ন পিতা জীৱিতা ৱোৰোপিতো হোতি, ন অৰহং জীৱিতা ৱোৰোপিতো হোতি, ন তথাগতস্স দুট্ঠেন চিত্তেন লোহিতং উপ্পাদিতং হোতি, ন সঙ্ঘো ভিন্নো হোতি, পঞ্ঞৱা হোতি অজড়ো অনেড়মূগো. ইমেহি খো, ভিক্খৱে, ছহি ধম্মেহি সমন্নাগতো সুণন্তো সদ্ধম্মং ভব্বো নিযামং ওক্কমিতুং কুসলেসু ধম্মেসু সম্মত্ত’’ন্তি. ততিযং.