১. ভত্তুদ্দেসকসুত্তং

২৭২. ‘‘পঞ্চহি, ভিক্খৱে, ধম্মেহি সমন্নাগতো ভত্তুদ্দেসকো ন সম্মন্নিতব্বো [ন সম্মনিতব্বো (ক.) চূড়ৱ. ৩২৬ পস্সিতব্বং]. কতমেহি পঞ্চহি? ছন্দাগতিং গচ্ছতি, দোসাগতিং গচ্ছতি, মোহাগতিং গচ্ছতি, ভযাগতিং গচ্ছতি, উদ্দিট্ঠানুদ্দিট্ঠং ন জানাতি – ইমেহি খো, ভিক্খৱে, পঞ্চহি ধম্মেহি সমন্নাগতো ভত্তুদ্দেসকো ন সম্মন্নিতব্বো.

‘‘পঞ্চহি, ভিক্খৱে, ধম্মেহি সমন্নাগতো ভত্তুদ্দেসকো সম্মন্নিতব্বো. কতমেহি পঞ্চহি? ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, উদ্দিট্ঠানুদ্দিট্ঠং জানাতি – ইমেহি খো, ভিক্খৱে, পঞ্চহি ধম্মেহি সমন্নাগতো ভত্তুদ্দেসকো সম্মন্নিতব্বোতি.

‘‘পঞ্চহি, ভিক্খৱে, ধম্মেহি সমন্নাগতো ভত্তুদ্দেসকো সম্মতো [সম্মতোপি (সী.)] ন পেসেতব্বো…পে… সম্মতো পেসেতব্বো… বালো ৱেদিতব্বো… পণ্ডিতো ৱেদিতব্বো… খতং উপহতং অত্তানং পৰিহৰতি… অক্খতং অনুপহতং অত্তানং পৰিহৰতি… যথাভতং নিক্খিত্তো এৱং নিৰযে… যথাভতং নিক্খিত্তো এৱং সগ্গে. কতমেহি পঞ্চহি? ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, উদ্দিট্ঠানুদ্দিট্ঠং জানাতি – ইমেহি খো, ভিক্খৱে, পঞ্চহি ধম্মেহি সমন্নাগতো ভত্তুদ্দেসকো যথাভতং নিক্খিত্তো এৱং সগ্গে’’তি. পঠমং.