(২৮) ৮. ৰাগপেয্যালং

১. সতিপট্ঠানসুত্তং

২৭৪. ‘‘ৰাগস্স, ভিক্খৱে, অভিঞ্ঞায চত্তাৰো ধম্মা ভাৱেতব্বা. কতমে চত্তাৰো? ইধ, ভিক্খৱে, ভিক্খু কাযে কাযানুপস্সী ৱিহৰতি আতাপী সম্পজানো সতিমা ৱিনেয্য লোকে অভিজ্ঝাদোমনস্সং; ৱেদনাসু…পে… চিত্তে…পে… ধম্মেসু ধম্মানুপস্সী ৱিহৰতি আতাপী সম্পজানো সতিমা ৱিনেয্য লোকে অভিজ্ঝাদোমনস্সং. ৰাগস্স, ভিক্খৱে, অভিঞ্ঞায ইমে চত্তাৰো ধম্মা ভাৱেতব্বা’’তি. পঠমং.

২. সম্মপ্পধানসুত্তং

২৭৫. ‘‘ৰাগস্স, ভিক্খৱে, অভিঞ্ঞায চত্তাৰো ধম্মা ভাৱেতব্বা. কতমে চত্তাৰো? ইধ, ভিক্খৱে, ভিক্খু অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি; উপ্পন্নানং পাপকানং অকুসলানং ধম্মানং পহানায…পে… অনুপ্পন্নানং কুসলানং ধম্মানং উপ্পাদায…পে… উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা ছন্দং জনেতি ৱাযমতি ৱীৰিযং আৰভতি চিত্তং পগ্গণ্হাতি পদহতি. ৰাগস্স, ভিক্খৱে, অভিঞ্ঞায ইমে চত্তাৰো ধম্মা ভাৱেতব্বা’’তি. দুতিযং.

৩. ইদ্ধিপাদসুত্তং

২৭৬. ‘‘ৰাগস্স, ভিক্খৱে, অভিঞ্ঞায চত্তাৰো ধম্মা ভাৱেতব্বা. কতমে চত্তাৰো? ইধ, ভিক্খৱে, ভিক্খু ছন্দসমাধিপধানসঙ্খাৰসমন্নাগতং ইদ্ধিপাদং ভাৱেতি; ৱীৰিযসমাধি…পে… চিত্তসমাধি…পে… ৱীমংসাসমাধিপধানসঙ্খাৰসমন্নাগতং ইদ্ধিপাদং ভাৱেতি. ৰাগস্স, ভিক্খৱে, অভিঞ্ঞায ইমে চত্তাৰো ধম্মা ভাৱেতব্বা’’তি. ততিযং.

৪-৩০. পৰিঞ্ঞাদিসুত্তানি

২৭৭-৩০৩. ‘‘ৰাগস্স, ভিক্খৱে, পৰিঞ্ঞায…পে… পৰিক্খযায… পহানায… খযায … ৱযায… ৱিৰাগায… নিৰোধায… চাগায… পটিনিস্সগ্গায চত্তাৰো ধম্মা ভাৱেতব্বা…পে…. তিংসতিমং.

৩১-৫১০. দোসঅভিঞ্ঞাদিসুত্তানি

৩০৪-৭৮৩. ‘‘দোসস্স…পে… মোহস্স… কোধস্স… উপনাহস্স… মক্খস্স… পড়াসস্স… ইস্সায… মচ্ছৰিযস্স… মাযায… সাঠেয্যস্স… থম্ভস্স… সাৰম্ভস্স… মানস্স… অতিমানস্স… মদস্স… পমাদস্স অভিঞ্ঞায… পৰিঞ্ঞায… পৰিক্খযায… পহানায… খযায… ৱযায… ৱিৰাগায… নিৰোধায… চাগায… পটিনিস্সগ্গায ইমে চত্তাৰো ধম্মা ভাৱেতব্বা’’তি. দসুত্তৰপঞ্চসতিমং.

ৰাগপেয্যালং নিট্ঠিতং.